काठमाडौं । गैह्रीगाउँ सामूहिक हत्या प्रकरणमा प्रहरीले पक्राउ गरेका व्यक्ति बोल्नै नसक्ने रहेको खुलेको छ ।

काठमाडौंको तीनकुनेस्थित मिलमा सामूहिक हत्या भएको घटनामा संलग्न रहेको आशंकामा प्रहरीले आज एक जनालाई पक्राउ गरेको थियो ।

सीसीटीभी फुटेजमा समेत कैद भएका ती व्यक्ति बोल्न नसक्ने भएको प्रहरी स्रोतले बतायो । सीसीटीभी फुटेजका आधारमा पक्राउ परेका उनी अन्दाजी २१/२२ वर्षका रहेका छन् । उनी एक्लैले चारजनाको हत्या गरेको प्रहरीको निस्कर्ष छ ।

उनी मोरङ घर भएका १९ वर्षका नवीन राईको हत्या गर्न सःमिलमा पुगेका थिए । घटनाबारे थाहा पाउने भएपछि उनले अरुमाथि पनि अन्धाधुन्ध आक्रमण गरेको प्रहरी अनुसन्धानबाट खुलेको छ ।

दिव्य सः फर्निचर मिलमा दोलखाका ५५ वर्षीय कुमार भुजेल, उनकी श्रीमती करिब ५० वर्षकी अम्बिका भुजेल र आमा सुमित्रा भुजेल र मोरङका १९ वर्षका नवीन राईको शुक्रबार राति हत्या भएको थियो।

यसअघि अपराध अनुसन्धान महाशाखाले घटनाको जानकारी गराउन आएका दीपेन्द्र राईलाई पक्राउ गरेर राखेको थियो ।