जनकपुरधाम । जनकपुरधामका युवाहरूले सरकारी बिदाका दिन चलाइएका सरकारी गाडी नियन्त्रणमा लिएका छन् ।

सरकारी गाडीको दुरुपयोग बढेको भन्दै युवाहरूले जनकपुरधाम उपमहानगरपालिकास्थित भानु चोकमा आज गाडी नियन्त्रणमा लिई धनुषा ट्राफिक प्रहरीलाई बुझाएका हुन् ।

जनकपुरको भानु चोकबाट युवा सङ्घका कार्यकर्ताहरूले ९ वटा सरकारी गाडी नियन्त्रणमा लिएका छन् ।

सेतो नम्बर प्लेटको सरकारी चारपाङ्ग्रे गाडी ३ थान, मोटरसाइकल ५ थान र एउटा स्कुटर नियन्त्रणमा लिएर आवश्यक कारबाहीका लागि जिल्ला ट्राफिक प्रहरी कार्यालयको जिम्मा लगाएको युवा संघ मधेस प्रदेशले जनाएको छ ।

अघिल्लो शनिवार पनि संघले यो अभियान चलाएको थियो ।