काठमाडौं । नेपाल शिक्षक महासंघले विद्यालय शिक्षासम्बन्धी कानुनलाई संशोधन गर्न बनेको विधेयकले गरेका व्यवस्थामा असन्तुष्टि जनाउँदै आन्दोलनको घोषणा गरेको छ ।

संसदमा दर्ता भएको विद्यालय शिक्षा ऐन २०८० को विधेयकमाथि गम्भीर आपत्ति जनाउँदै महासंघले सडक आन्दोलनको घोषणा गरेको हो ।काठमाडौंमा पत्रकार सम्मलेलन गरेर विधेयक संशोधन गर्न १८ बुँदे मागअघि सारिएको छ ।

माग पुरा नभए असोज ३ गतेबाट शिक्षकहरु काठमाडौंको सडक आन्दोलनमा जुट्ने महासंघले जनाएको छ । शिक्षा मन्त्रालयले विधेयक बुधबार प्रतिनिधि सभामा दर्ता गराएको छ ।

त्यसमा शिक्षकको नियुक्ति, सरुवा, बढुवामा स्थानीय तहलाई भूमिका दिइएको छ । शिक्षकहरुले भने यो भूमिका संघ अन्तर्गतको जिल्ला शिक्षा कार्यालयलाई मात्र यस्तो अधिकार हुनुपर्ने माग गरेका छन् ।

विधेयकमा जिल्ला शिक्षा कार्यालय पुनर्स्थापना गर्ने व्यवस्था राखिएको छ । तर यो व्यवस्था संविधानविरोधी हुने भन्दै स्थानीय तहका जनप्रतिनिधिले विरोध गर्दै आएका छन् ।

महासंघले विधेयकको विभिन्न १७ बुँदामा असहमति जनाउँदै संशोधन गरेर जानुपर्ने बताएको छ । महासंघले सडक आन्दोलन आफूहरूको रहर नभएर बाध्यता भएको बताउँदै माग सम्बोधन नभएसम्म सडक आन्दोलन नरोकिने चेतावनी दिएको छ ।