काठमाडौं । प्रधानमन्त्री पुष्पकमल दाहाल ‘प्रचण्ड’को चीन भ्रमण सफल बनाउन संसद्‌मा प्रतिनिधित्व गर्ने दलहरु एकमत भएका छन्।

आइतबार सिंहदरबारमा बसेको सर्वदलीय बैठकमा प्रधानमन्त्रीको भ्रमण सफल बनाउनेबारे सहमति भएको हो ।

असोज पहिलो साता हुने आफ्नो चीन भ्रमण र भ्रमणका अजेन्डाबारे छलफल गर्न प्रधानमन्त्री प्रचण्डले आइतबार सर्वदलीय बैठक बोलाएका थिए।

बैठकमा पूर्व प्रधानमन्त्रीसहित संसद्‌मा प्रतिनिधित्व गर्ने दल नेता र प्रतिनिधिहरु सहभागी थिए। छलफलपछि परराष्ट्रमन्त्री एनपी साउदले प्रधानमन्त्रीको चीन भ्रमण सफल बनाउनेबारे दलहरुमा साझा सहमति भएको बताए।

बैठकबाट प्रधानमन्त्रीको भ्रमणबारे महत्त्वपूर्ण सुझावहरु प्राप्त भएको र सुझावहरुलाई सरकारले महत्त्वका साथ लिएको मन्त्री साउदको भनाइ छ।