विराटनगर । स्रोत नखुलेको ९ लाख रुपैयाँसहित सशस्त्र प्रहरीले एक जनालाई पक्राउ गरेको छ।

पक्राउ पर्नेमा विराटनगर महानगरपालिका–१४ का २६ वर्षीय कृष्ण चौधरी रहेका छन्। चौधरीको साथबाट नौ लाख १७ हजार सात सात सय ५५ नेपाली रुपैयाँ बरामद भएको सशस्त्र प्रहरी बल मोरङले जनाएको छ ।

विराटनगर–१४ मन्ठा पोखरीनजिकबाट चौधरी पक्राउ परेका हुन्। सशस्त्र प्रहरीले पक्राउ गरेका बेला उनी भारतबाट प्रदेश १–०२–०४९ प ४३६८ नम्बरको मोटरसाइकलमा नेपाल आउँदै थिए।

मोटरसाइकल रोकेर खानतलासी गर्दा सिटमुनि लुकाएर ल्याएको अवस्थामा स्रोत नखुलेको रकम फेला परेको थियो ।

चौधरीलाई थप अनुसन्धान र आवश्यक कारबाहीका लागि शुक्रबार राजस्व अनुसन्धान कार्यालय इटहरीमा बुझाइएको सशस्त्रले जनाएको छ। बरामद भएको रकम अवैध हुण्डी कारोबारको भएको हुनसक्ने आशंका गरिएको छ।