काठमाडौं । सञ्चार सूचना तथा प्रविधिमन्त्री रेखा शर्माले विचारकै आधारमा कसैमाथि पनि सांघातिक आक्रमण गर्न नपाईने बताएकी छन् ।

मन्त्रिपरिषद्को बैठकको निर्णय सार्वजनिक गर्दै सरकारकी प्रवक्ता समेत रहेकी सञ्चारमन्त्री शर्माले यस्तो बताएकी हुन् ।

कांग्रेस सहमहामन्त्री महेन्द्र यादवमाथि आक्रमणको घटनाको बारेमा बोल्दै मन्त्री शर्माले कसैको विचारका आधारमा सांघातिक आक्रमण गर्ने छुट कसैलाई नभएको बताईन् ।

सञ्चारमन्त्री शर्माले भनिन्, ‘अहिले सांघातिक आक्रमण गर्नेलाई हामीले पक्राउ गरिसकेका छौं । लोकतन्त्र, गणतन्त्रमा सबै कुरा गर्न पाइन्छ, आफ्ना विचार व्यक्त गर्न पाइन्छ । तर, विचारका आधारमा कसैमाथि पनि सांघातिक आक्रमण गर्न पाइँदैन । यो संविधान, कानून र नियमविपरितकै कामहरु हुन् । त्यसबारे थप अनुसन्धान जारी छ ।’

अनुसन्धान टुंग्याएपछि सरकारले त्यसबारे आफ्नो धारणा सार्वजनिक गर्ने बताइन् ।

तरुण दलका पूर्वअध्यक्ष समेत रहेका यादवलाई बिहीबार भृकुटीमण्डपमा नुवाकोटका श्यामबहादुर सापकोटाले खुकुरी प्रहार गरी घाइते बनाएका थिए ।

आक्रमणबाट घाइते यादवको टाउको पछाडि भागमा चोट लागेको छ ।’उनको ट्रमा सेन्टरमा उपचार भइरहेको छ ।