काठमाडौं । त्रिवि इन्जिनियरिङ अध्ययन संस्थानले बढेको शुल्क पुनरावलोकनका लागि समिति गठन गरेको छ ।

त्रिवि इन्जिनियरिङ अध्ययन संस्थान डीनको कार्यालयले सहप्राध्यापक हरिराम पराजुलीको नेतृत्वमा ११ सदस्यीय समिति गठन गरेको हो।

समितिमा थापाथली, पुल्चोक इन्जिनियरिङ क्याम्पसका स्ववियु सभापतिहरू पनि सदस्य छन्। यसअघि ३ लाख १३ हजार रुपैयाँ रहेको इन्जिनियरिङ अध्ययनको शुल्क वृद्धि गरी ७ लाख ७५ हजार ४ सय २० रुपैयाँ पुर्‍याइएको थियो।

उक्त शुल्कवृद्धिको विरोधमा पुल्चोक क्याम्पसमा अध्ययनरत छात्र सुलभ चापागाईले आमरण अनसन गरेका थिए। विभिन्न विद्यार्थी संघ संस्थाहरुले शुल्क वृद्धिको विरोध गर्दै बालुवाटार घेराउ समेत गरेका थिए।

त्रिवि र आन्दोलनरत विद्यार्थीहरुबीच शुल्क वृद्धि फिर्ता लिने सहमति भएपछि विद्यार्थीहरुले आन्दोलनका कार्यक्रम फिर्ता लिएका थिए। उक्त सहमतिपछि बनेको शुल्क पूनरावलोकन समितिले विभिन्न शैक्षिक कार्यक्रमका लागि निर्धारण गरिएको शुल्कमा पूनरावलोकन गरी ७ दिन भित्र प्रतिवेदन पेस गर्न भनेको छ।