काठमाडौं । त्रिभुवन विश्वविद्यालय इन्जिनियरिङ संस्थान र शुल्क वृद्धिको विरोधमा आन्दोलनरत विद्यार्थीहरुबीच सहमति भएको छ ।

आन्दोलनरत विद्यार्थी र त्रिभुवन विश्वविद्यालय सम्बद्ध पदाधिकारीहरुबीच आइतबार ४ बुँदे सहमति भएको हो ।

सहमतिसँगै स्ववियु पुल्चोक र अनेरास्ववियुले गरेको आन्दोलनका सबै कार्यक्रम पनि फिर्ता भएको छ । इन्जिनियरिङ अध्ययन संस्थानले हालै मात्र पूर्ण शुल्कमा पढ्ने विद्यार्थीहरुको शुल्क बृद्धि गरेको थियो ।

जसअनुसार ३ लाख १८ हजार रहेको शुल्क बढेर ७ लाख ७७ हजार पुग्ने भयो । आइतबार त्रिवि पदाधिकारीका साथै इन्जिनियरिङ अध्ययन संस्थानका प्रतिनिधिले अनेरास्ववियु र स्ववियु पुल्चोकका प्रतिनिधिहरुसँग नयाँ सहमति गरेका छन् ।

सहमतिमा संस्थानले बृद्धि गरेको शुल्क फिर्ता लिने, कर्णली र मधेस प्रदेशमा क्याम्पस स्थापना प्रक्रिया अगाडि बढाउने, संस्थानको आर्थिक संकट समाधानको विकल्प खोज्न सर्वपक्षीय सहमति बनाउने उल्लेख छ ।