काठमाडौं । काठमाडौं उपत्यका अपराध अनुसन्धान कार्यालयले पोर्चुगल पठाईदिन्छु भन्दै लाखौ ठगी गर्ने एक जनालाई पक्राउ गरेको छ ।

पक्राउ पर्नेमा प्युठानको मल्लरानी गाँउपालिका-४ खलंगा स्थाई घर भई हाल काठमाडौं महानगरपालिका-२६ सामाखुशी बस्ने नवराज खड्का रहेका छन् ।

पक्राउ परेको खड्काले सन्दिप परियारलाई वर्किङ भिषामा वैदेशिक रोजगारीका लागि पोर्चुगल पठाई दिने भन्दै तीन लाख ठगी गरेको उपत्यका अपराध अनुसन्धान कार्यालयले जनाएको छ ।

खड्काले मासिक १ लाख ५० हजार भन्दा बढी कमाई हुने भन्दै परियारसंग १५ लाख रुपैयाँ मागेका थिए । खड्काले ठगी गरेर फरार भएपछि वैदेशिक रोजगार विभागले उपत्यका अपराध अनुसन्धान कार्यालयलाई पक्राउ गरी उपस्थित गराइदिन भन्दै पत्र लेखेको थियो ।

पत्र पाए लगत्तै उपत्यका अपराध अनुसन्धान कार्यालयबाट खटिएको प्रहरी टोलीले खड्कालाई आज सामाखुशीबाट पक्राउ गरेको जनाएको छ । पक्राउ परेका खड्कालाई थप अनुसन्धान तथा कारवाहीको लागि वैदेशिक रोजगार विभाग ताहाचल काठमाडौं पठाईएको पनि प्रहरीले जनाएको छ ।