काठमाडौं । रुसको निजी सैन्य समूह वागनर समूहका प्रमुख येभगेनी प्रिगोजिनसहित १० जना सवार विमान दुर्घटना भएको छ । विमान राजधानीबाट करिब ३०० किलोमिटर उत्तरमा टभर क्षेत्रको कुझेनकिनो गाउँ नजिकै दुर्घटना भएको हो ।

रुसको आपतकालीन मन्त्रालयका अनुसार विमानमा तीन चालक दलका सदस्य र सात यात्रु सवार थिए । रुसको संघीय हवाइ यातायात एजेन्सी रोसाभिएट्सियाले प्रिगोजिन र वाग्नर समूहका कमाण्डर दिमित्री उटकिनसहित सात यात्रुहरूको नाम प्रकाशन गरेको छ ।

विमान दुर्घटनामा मृत्यु हुनेहरूको सूचीमा प्रिगोजिन र सहसंस्थापक दमित्री अतकिनको नाम पनि सार्वजनिक गरिएको छ । यो विमान कसैले आक्रमण गरेर जमिनमा खसालेको हो या अरु कुनै कारणले दुर्घटना भएको हो भन्ने खुलेको छैन ।

दुर्घटनापछि विमानमा आगो लागेको थियो । प्रिगोजिनले गएको जुनमा रुसी सरकारविरुद्ध एक असफल विद्रोह गरेका थिए ।