गोरखा । उपप्रधानमन्त्री तथा गृहमन्त्री नारायणकाजी श्रेष्ठले भ्रष्टाचारविरूद्ध बाधा पुर्‍याउने प्रयास भइरहेको बताएका छन् ।

गोरखामा आयोजित एक कार्यक्रममा बोल्दै गृहमन्त्री श्रेष्ठले यस्तो बताएका हुन् । भ्रष्ट्राचारविरुद्ध अभियान चालउँदा सरकारलाई चौतर्फी घेराबन्दी भएको गृहमन्त्री श्रेष्ठको दाबी छ ।

गृहमन्त्री श्रेष्ठले भने,‘मन्त्रीलाई धम्की दिएर, पख्लास् भनेर, घेराबन्दीमा राख्छौं भनेर कसैले नसोचे हुन्छ । हामी पदका लागि गएका होइनौं, देश र जनताको सेवा गर्न गएका हौं । जुन दिनसम्म सरकारमा रहन्छौं यो सुशासनको अभियान रोकिन्न ।’

गृहमन्त्री श्रेष्ठले सुशासनको अभियान रोक्न आफूमाथि घेराबन्दी र धम्की दिन खोजिएको बताए । उनले ठग,तस्कर र भ्रष्टाचारीका संरक्षकहरुले सरकारलाई अप्ठेरोमा पार्न खोजेको बताए ।

गृहमन्त्री श्रेष्ठले सरकारलाई भाँजो हाल्न सकिन्छ भनेर तस्कर तथा भ्रष्टाचारीका संरक्षकहरूले तैँ चुप मैँ चुप गर्न खोजेको भन्दै अब त्यो सम्भव नरहेको बताए । उनले कसैको घेराबन्दीले सुशासनको अभियान नरोकिने बरु सरकार छाड्ने बताए ।