काठमाडौं । सत्ता गठबन्धनको बैठकले गौर हत्याकाण्डको फाइल बन्द गर्नुपर्ने निष्कर्ष निकालेको छ । सोमबार अपरान्ह प्रधानमन्त्री निवास बालुवाटारमा बसेको बैठकले सो निष्कर्ष निकालेको हो ।

एकीकृत समाजवादीका उपाध्यक्ष राजेन्द्र प्रसाद पाण्डेले बैठकमा गौर हत्याकाण्डको विषयमा छलफल भएको र अब यसलाई ‘क्लोज’ गरेर अघि बढ्नुपर्ने निष्कर्ष आएको जानकारी दिए ।

‘गौर हत्याकाण्डमा जो मारिए तीनलाई सहिद घोषणा गर्ने काम भइसकेको छ। तीनलाई क्षतिपूर्ती पनि राज्यले दिइसकेको छ,’ पाण्डेले भने, ‘गौर हत्याकाण्डमा अरु केही बाँकी नै छैन । यसलाई क्लोज गर्नुभन्दा बाहेक अरु बाँकी छैन । उनले यो काण्ड जसले उठायो त्यो उठाउने मान्छे आफै चार वटा हत्याकाण्डको नाइके हो ।’

आजको बैठकमा जसपाले आफूहरूलाई गौर हत्याकाण्डको विषय उठाएर निसाना गरिए सरकार नै छाड्ने चेतावनी दिएको छ । गौर हत्याकाण्ड पीडित संघर्ष सहमति र सरकारबीच गत साउन २३ गतेमात्रै पाँच बुँदे सहमति भएको थियो ।