संखुवासभा । जिल्ला कारागार संखुवासभामा दुई जना कैदीको मृत्यु पक्ररणमा १० जना प्रहरी अनुसन्धानमा तानिएका छन्।

घटना हुँदा ड्युटीमा रहेका १० जना प्रहरीलाई नियन्त्रणमा लिएर अनुसन्धान थालिएको हो । कारागारबाट भाग्न लागेको अवस्था नियन्त्रणमा लिइएका दुई कैदीबन्दी बुधबार बिहान ६ बजे कारागारमै अचेत फेला परेका थिए ।

मृतकको परिवारले दुई कैदीको प्रहरीको कुटपिटबाट मृत्यु भएको आरोप लगाएपछि कारागार सुरक्षामा खटिएका प्रहरीमाथि छानिबन सुरु भएको कोशी प्रदेश प्रहरी कार्यालयले जनाएको छ ।

बुधबार बिहान १ बजे कैदी विनोद तोलांगी र आकाश बलामी कारागारको शौचालयको झ्यालको रड काटेर भाग्न खोजेका थिए । त्यसक्रममा नियन्त्रणमा लिएपछि कारागारभित्र झडप र कुटपिट हुँदा दुई जनाको मृत्यु भएको प्रहरीले जनाएको छ ।

त्यसपछि घटनाको शंकास्पद् रहेकाले अनुसन्धानका लागि सोही दिन संखुवासभाका सहायक प्रमुख जिल्ला अधिकारी मोहनमणि घिमिरेको नेतृत्वमा समिति गठन भएको थियो।

पछि प्रदेश प्रहरी कार्यालयका एसपी कँडेलको नेतृत्वमा ४ सदस्यीय र कारागार व्यवस्थापन विभागका अधिकृत कमल पाण्डे नेतृत्वमा ५ सदस्यीय छानबिन समिति गठन भएर घटनाको अनुसन्धान भइरहेको छ।