एजेन्सी । दक्षिण अमेरिकी देश इक्वेडरमा राष्ट्रपति चुनावका प्रतिस्पर्धीको हत्या भएपछि देशभर संकटकाल लगाइएको छ ।

राष्ट्रपतिका पदका लागि लोकप्रिय उम्मेदवार ५९ वर्षीय फर्नान्डो भिल्लाभिसेन्सियोको बुधबार राजधानी क्विटोमा गोली हानेर हत्या गरिएको हो ।

इक्वेडरको राष्ट्रिय सभा सदस्य तथा पूर्वपत्रकारसमेत रहेका उनले लागूऔषध तस्करीमा संलग्न आपराधिक गिरोह र भ्रष्टाचारविरुद्ध अभियान चलाउँदै आएका थिए ।

क्विटोमा एक चुनावी कार्यक्रममा सहभागी भएर आफ्नो कारमा बसेका फर्नान्डोमाथि गोली प्रहार भएको हो । आक्रमणकारीले हानेको गोली उनको टाउकोमा लागेको थियो । लगत्तै सुरक्षाकर्मीले जवाफी कारबाहीको गरेको र एक संदिग्ध आक्रमणकारीको मृत्यु भएको बताइएको छ ।