काठमाडौं । सांसद सुनिल शर्मालाई प्रहरीको केन्द्रीय अनुसन्धान व्युरो (सिआईबी) ले पक्राउ गरेपछि नेपाली कांग्रेसका सभापति शेरबहादुर देउवा असन्तुष्ट बनेका छन् ।

मोरङ क्षेत्र नम्बर–३ बाट निर्वाचित कांग्रेसका सांसद शर्मालाई सिआईबीले बिहीबार शैक्षिक प्रमाण पत्र कीर्ते गरेको कसूरमा पक्राउ गरेको थियो । सांसद शर्मालाई पक्राउ गरेपछि सभापति देउवा असन्तुिष्ट व्यक्त गर्दै बालुवाटार पुगेका हुन् ।

धुम्बाराहीस्थित निवासमा कांग्रेस नेताहरूसँग आन्तरिक छलफल गरेलगत्तै सभापति देउवा प्रधानमन्त्री पुष्पकमल दाहाललाई भेट्न बालुवाटार पुगेका छन् । आन्तरिक छलफलमा गृहमन्त्री नारायणकाजी श्रेष्ठको कार्यशैलीको आलोचनासमेत भएको बुझिएको छ ।

यसअघि सांसद शर्माले प्रतिनिधिसभा बैठकमा बोल्दै एक क्विन्टल सुन तस्करी प्रकरणको छानबिन गर्न माग गरेका थिए । उनले यही साउन १० गते बसेको प्रतिनिधिसभा बैठकमा बोल्दै त्रिभुवन विमानस्थल भन्सार कार्यालयबाट सुन बरामद भएको घटनामा भरियामात्र पक्राउ गरेको र मुख्य नाइके पक्राउ गर्न नसकेको भन्दै गृहमन्त्री र अर्थमन्त्रीको राजीनामा मागेका थिए ।