काठमाडौं । अभिनेता सारुक ताम्राकारको चिरशान्तिको कामना गर्दै दीप प्रज्वलन गरिने भएको छ ।

सारुकको निधनको १४औं दिनमा बुधबार बौद्धस्थित बौद्ध स्तुपामा साँझ ६ बजेदेखि ७ बजेसम्म दीप प्रज्वलन गर्न लागिएको हो ।

उनको सम्झनामा हुन लागेको दीप प्रज्वलनमा सहभागी हुनका लागि अभिनेत्री सृष्टि श्रेष्ठलगायतका कलाकारहरुले एक पोस्टमार्फत् आग्रह गरेका छन् ।

पछिल्लो समय सारुकको आत्महत्याको विषयमा उचित छानबिनका लागि विभिन्न कलाकारले सामाजिक सञ्जालबाट माग गरिरहेका छन् । सारुक गत असार २१ गते रातोपुलस्थित निजी निवासमा झुण्डिएको अवस्थामा भेटिएका थिए ।

उनले ‘ईन्टु मिन्टु लण्डनमा’, ‘मेरी मामु’, ‘रानी’, ‘नमरी बाचे’ लगायत फिल्म अभिनय गरेका छन् । उनी पछिल्लो समय अभिनेत्री नम्रता श्रेष्ठ अभिनीत फिल्म ‘ह्यासट्याग माया’मा अभिनयरत थिए ।