काठमाडौं । नेपाली युवायुवतीलाई आकर्षक रोजगारीका नाममा म्यानमार पुर्‍याएर अनलाइन ठगीमा लगाउने एक जना पक्राउ परेका छन् ।

पक्राउ पर्नेमा चीनको ज्ञानसु प्रान्त घर भई काठमाडौं महानगरपालिका १५ बिजेश्वरीमा अस्थायी रुपमा बस्ने ४२ वर्षीय लियाङ जुन रहेका छन् ।

उनले थाइल्याण्डमा आकर्षक रोजगारीमा लगाइदिने भन्दै नेपाली युवतीलाई म्यानमार पुर्‍याएर अनलाइन ठगीमा लगाउने गरेका थिए ।

लियाङलाई मानव बेचबिखन अनुसन्धान व्यूरो बबरमहलबाट खटिएको प्रहरी टोलीले आज पक्राउ गरेको हो ।

जुन सन् २०१८ देखि नेपालमा विद्यार्थी, भिजिट र बिजनेसलगायत भिसामा बस्दै आएको र नेपालबाट युवायुवतीलाई म्यानमारमा लगेर अनलाइन ठगीमा संलग्न गराउने गरेको मानव बेचबिखन अनुसन्धान ब्यूरोले जनाएको छ ।