काठमाडौं । विभागीय टोली त्रिभुवन आर्मी फुटबल क्लबले भारतमा हुने एसियाकै सबैभन्दा पुरानो फुटबल प्रतियोगिताको रुपमा रहेको डुरान्ड कप फुटबल प्रतियोगिता खेल्ने भएको छ ।

डुरान्ड कपमा २७ वर्षपछि विदेशी क्लब सहभागी हुँदा नेपालबाट आर्मीले खेल्न लागेको हो । प्रतियोगितामा भुटान र बंगलादेशका एक-एक टिम पनि सहभागी रहने छन् ।

डुरान्ड फुटबल टुर्नामेन्ट सोसाइटी र भारतीय फुटबल महासंघको आयोजनामा हुने प्रतियोगितामा इन्डियन सुपर लिग , आई लिगका क्लबहरुसहित कूल २४ टिमले प्रतिस्पर्धा गर्नेछन् ।

आर्मी रहेको समूह आईएसएल क्लब हैदरावाद एफसी र चेन्नाइयीन एफसी तथा आई लिगको दिल्ली एफसी रहेको जनाईएको छ ।

आगामी अगष्ट ३ देखि सेप्टेम्बर ३ सम्म कोलकतामा आयोजना हुने खेलमा सहभागी २४ टोलीलाई ६ समूहमा विभाजन गरेर खेलाइनेछ । प्रतियोगिताको विजेताले ६३ हजार अमेरिकी डलर पुरस्कार पाउने छ ।