काठमाडौं । जिम्बावेमा जारी आइसीसी विश्वकप छनोटको सुपर सिक्स खेलमा ओमानले वेस्ट इन्डिजलाई २२२ रनको लक्ष्य दिएको छ ।

हरारे स्पोर्ट्स क्लबमा टस हारेर पहिला ब्याटिङ गरेको ओमानले निर्धारित ५० ओभरमा ९ विकेट गुमाउँदै २ सय २१ रनको योगफल बनाएको हो ।

ओमानका लागि नेपाली मुलका सुरज कुमारले अविजित ५३ रन बनाए । सुरजले ६५ बलमा पाँच चौका र एक छक्का प्रहार गरे । सोएब खानले ५० रन थपे ।

वेस्टइन्डिजका रोमारियो शेफर्डले ३ तथा कायल मेयर्सले २ विकेट लिए ।

छनोटबाट शीर्ष स्थानमा रहेको श्रीलंकाले भारतमा हुने विश्वकपमा स्थान बनाइसक्दा अर्को एक टिमको टुंगो लाग्न भने बाँकी छ । सुपर सिक्समा श्रीलंकासँगै वेस्ट इन्डिज, ओमान, जिम्बाब्वे, स्कटल्यान्ड र नेदरल्यान्ड्स छन् ।