काठमाडौं । वर्षासँगै देशका सानाठूला नदीहरूमा पानीको बहाव क्रमशः बढ्दो क्रममा छ । जसअनुसार आज सात जिल्ला र आसपास भएर बहने नदीहरूमा जलसतह बढ्न सक्ने आकलन गरिएको छ ।

आज ईलाम, झापा, पाँचथर, संखुवसभा, मकवानपुर, बारा, पर्सा र आसपास भई बहने केही स(साना नदीहरुमा बहाब उल्लेख्य बढ्ने र केहीमा आकस्मिक बाढीको जोखिम रहेको मौसम पूर्वानुमान महाशाखाले जनाएको छ ।

आज बिहानको मापन अनुसार कोशी, कन्काई, नारायणी, कर्णाली, महाकाली, बबई, पश्चिम राप्ती, कमला, बागमती, पूर्वी राप्ती र यसका सहायक नदीहरूको बहाब सतर्कता तह भन्दा तलै र सामान्य अवस्थामा रहेको छ ।

यी नदीहरूमा जलसतह सतर्कता तहभन्दा तलै रहेपनि जलसतह बढ्न सक्ने भएकाले तटीय क्षेत्रमा सतर्कता अपनाउन महाशाखाले अनुरोध गरेको छ ।