काठमाडौं । विशेष अदालतले नेपाल आयल निगमका पूर्वकार्यकारी निर्देशक गोपालबहादुर खड्कालाई एक वर्ष तीन महिना कैद सजाय तोकेको छ ।

गैरकानूनी सम्पत्ति आर्जन मुद्दामा दोषि ठहर गर्दै विशेषका अध्यक्ष श्रीकान्त पौडेल तथा सदस्यद्वय शालिग्राम कोइराला र खुसीप्रसाद थारुको इजलासले निर्देशक खड्कालाई शुक्रबार सजाय सुनाएको हो।

अख्तियारले मागदाबी लिएबमोजिम खड्काको नाममा रहेको घरजग्गा, बैंक मौज्दात, सेयरलगायतका सम्पत्ति जफत हुने भएको छ । खड्का २०७१ सालको माघमा निगमको कार्यकारी निर्देशक पदमा नियुक्त भएका थिए ।

निर्देशक खड्कालाई ९ करोड १९ लाख ६ हजार ६३४ रुपैयाँ ६४ पैसा बिगो बमोजिम जरिवाना गराउने भनिएको छ ।

उनीविरुद्ध २०७५ सालमा अख्तियार दुरुपयोग अनुसन्धान आयोगले गैरकानुनी रूपमा १८ करोड ६६ लाख रुपैयाँ आर्जन गरेको भन्दै विशेष अदालतमा मुद्दा दायर गरेको थियो ।

गोपालसँगै उनकी श्रीमती शर्मिला खड्कालाई समेत प्रतिवादी बनाइएकोमा शर्मिलाका नाममा रहेको कित्ता नं १५२२ र १४२३ मा रहेको घरसमेत जफत हुने भएको छ।