काठमाडौं । प्रधानमन्त्री पुष्पकमल दाहाल ‘प्रचण्ड’ले भ्रष्टाचारविरुद्धको लडाई अझै नरोकिने बताएका छन् ।

बुधबार प्रतिनिधिसभा बैठकमा नक्कली भुटानी शरणार्थी प्रकरण, ललिता निवास प्रकरण, मिटरब्याजी प्रकरणमा सरकारले एकपछि अर्को सफलता हात पारिरहेको उल्लेख गर्दै उनले भ्रष्टाचारलगायतका विकृतिविरुद्धको लडाई नरोकिने बताएका हुन् ।

उनले प्रधानमन्त्री तथा मन्त्रिपरिषद् कार्यालय, उपराष्ट्रपति कार्यालय र राष्ट्रिय योजना आयोगको सचिवालयको विनियोजन शीर्षकमाथि सांसदहरूले उठाएका प्रश्नको जवाफ दिने क्रममा नक्कली भुटानी शरणार्थी प्रकरणमा सफलता हात पर्दै गएको उल्लेख गरे ।

प्रधानमन्त्री प्रचण्डले भने, ‘मलाई अझै बढी समर्थन चाहिएको छ। यो लडाइँमा सदन र आमजनताको पनि हौसला र सहयोग मिल्नेछ। कुनै पनि मूल्यमा विकृतिविरुद्धको यो लडाइँ अघि बढाइनेछ।’

प्रधानमन्त्री प्रचण्डले नक्कली उक्त प्रकरणमा सफलता हातपारेसँगै उच्चपदस्थहरू र देशका एउटा वर्ग कानुनभन्दा माथि छ भन्ने निराशावादी मान्यता गलत प्रमाणित हुँदै गएको बताए ।

साथै आफूले सरकार सञ्चालन गरेयता सबैभन्दा ठूलो उपलब्धि जनतामा राज्य र व्यवस्थाप्रति भरोसा जगाउनु रहेको जिकिर समेत गरे ।