एजेन्सी । बेलायती सेनाका जासुसहरूले युक्रेनी सेनाको सामना गर्न रूसले आफ्नो नियन्त्रणमा रहेको क्रिमियाली प्रायद्वीपमा लडाकू डल्फिनलाई प्रशिक्षण दिइरहेको दाबी गरेको छ ।

गत वर्षदेखि सेवस्तोपोलमा रहेको ‘ब्ल्याक सी’ क्षेत्रको मुख्य आधारको सुरक्षामा रुसी नौसेनाले ठूलो लगानी गरेको बेलायती गुप्तचर सेवाले दाबी गरेको हो ।

‘यसमा बन्दरगाहको प्रवेशद्वारमा कम्तीमा चार तहको तारबार लगाइएको छ। हालैका हप्ताहरूमा, प्रशिक्षित समुद्री स्तनधारीहरूको बढ्दो सङ्ख्याले यी प्रतिरक्षाहरूमा पनि वृद्धि भएको देखिन्छ । चित्रहरूले बन्दरगाहमा तैरिरहेका स्तनपायीहरूको सङ्ख्या लगभग दोब्बर भएको देखाउँछ जसमा बोतल–नाक भएको डल्फिनहरू हुन सक्छन्,’ उक्त बेलायती संस्थाले जारी गरेको विज्ञप्तिमा भनिएको छ ।

ती जनावरहरू शत्रुका गोताखोरहरूको सामना गर्ने उद्देश्यले बनाइएको हुनसक्ने बताइएको छ। रूसी नौसेनाले आर्कटिक जलक्षेत्रमा विभिन्न अभियानका लागि बेलुगा ह्वेल र सीलको प्रयोग गरेको छ।