काठमाडौं । प्रधानमन्त्री पुष्पकमल दाहाल ‘प्रचण्ड’ले रासायनिक मलको आपूर्ति विगतको भन्दा सुदृढ भएको भन्दै यो वर्ष धान बालीका लागि मल अभाव नहुने दाबी गरेका छन् ।

शुक्रबार प्रतिनिधिसभा बैठकमा सांसद अब्दुल खानले कृषकले मल नपाएको भन्दै प्रश्न गरेपछि जवाफ दिँदै प्रधानमन्त्री प्रचण्डले यस्तो बताएका हुन् ।

प्रधानमन्त्री प्रचण्डले भने, ‘रासायनिक मलको आपूर्ति सुदृढ भएको छ । ३ लाख ५१ हजार मेट्रिक टन मल आयात भएको छ । मल अभाव हुने अवस्था छैन । मलका लागि १५ अर्ब रुपैयाँ विनियोजन भएको छ ।’

साथै उनले हाल ७१ हजार मेट्रिक टन मल मौजाद रहेको समेत जानकारी गराए ।