काठमाडौं । काठमाडौं महानगरपालिकाले रोक लगाएको उच्च शिक्षालय तथा माध्यमिक विद्यालय संघ नेपाल (हिसान) शैक्षिक मेला शुक्रबारदेखि नियमित हुने भएको छ ।

काठमाडौं महानगरपालिकाले बन्द गराएको शैक्षिक मेला नरोक्न उच्च अदालत पाटनको अन्तरिम आदेशपछि फेरि सुरु हुन लागेको हो ।

बिहीवार काठमाडौंमा हिसानले पत्रकार सम्मेलन गर्दै असार ८, ९ र १० गते तीन दिन काठमाडौंको भृकुटीमण्डपमा बिहान १० देखि अपराह्न ५ बजेसम्म मेला सञ्चालन हुने जानकारी दिएको हो ।

एसइई र प्लस टुको रिजल्ट प्रकाशन हुनुअगाडि नै शैक्षिक मेलाका नाममा विद्यालयहरूले शुल्क र भर्नाका लागि नाम टिपाउने गरेका भन्दै गत बिहीबार महानगरपालिकाले मेला बन्द गराएको थियो ।

महानगरको कदमविरुद्ध हिसानले उच्च अदालत पाटनमा निषेधाज्ञाको रिट दर्ता गरेको थियो ।