झापा । झापाको कचनकवलका गाउँपालिका-३ का वडा अध्यक्षमाथि कुटपिट भएको छ । बिरामी छोरीको उपचारका लागि श्रीमतीसहित बिर्तामोडस्थित मनमोहन अस्पताल गएका वडा अध्यक्ष ग्यास अजमल मियामाथि कुटपिट भएको हो ।

वडा अध्यक्ष मियामाथि बिहीबार बिहान अस्पताल गेटसँगै टाँसिएको मुख्य सडकमा कुटपिट भएको थियो। वडा अध्यक्ष मियालाई मेचीनगर नगरपालिका-६ निवासी ३६ वर्षीय विजय पनेरुले हेलमेट प्रहार गरी कुटपिट गरेको बताइएको छ।

वडा अध्यक्ष मिया श्रीमतीसहित आफ्नो कारभित्र बसिरहेको बेला पनेरुले अन्धाधुन्ध हेलमेट प्रहार गरेको थिए । प्रदेश–१–०१–०१७ प ६५३७ नम्बरको मोटरसाइकलका सवार पनेरु पूर्वबाट पश्चिमतर्फ गइरहेको बेला सडकमा लडेका थिए।

कुटपिटबाट वडा अध्यक्ष मियाको नाकको दुवै डाँडी भाँचिएको छ। उनको सोही अस्पतालमा उपचार भइरहेको छ। घटनाभए लगतै कुटपिटमा संलग्न पनेरु मोटरसाइकल चढेर भाग्न खोज्दा प्रहरीले पक्राउ गरेको छ।