काठमाडौं । सेवा सुरक्षा ग्यारेन्टीसहितको माग अघि सारेर आन्दोलन गर्दै आएका विद्यालय कर्मचारीले बिहीबार पनि काठमाडौं विरोध प्रदर्शन गरेका छन् ।

जेठ २० गतेदेखि राजधानी केन्द्रित आन्दोलन गरिरहेका देशभरका विद्यालय कर्मचारीले माइतीघर मण्डलामा गरेको प्रदर्शनमा प्रहरीले हस्तक्षेप गरेको छ ।

नेपाल विद्यार्थी कर्मचारी परिषद्को अगुवाइमा भइरहेको आन्दोलनका क्रममा बिहीबार प्रदर्शनकारीले भद्रकालीमा रिले अनसन बसेर माइतीघर मण्डला फर्किँदै गर्दा बीच सडकमा बस्न खोज्दा प्रहरीले हस्तक्षेप गरेको हो ।

प्रदर्शनको क्रममा सडकमै बसेर आवागमन अवरुद्ध गर्न खोजेको भन्दै प्रहरीले ४ जनालाई नियन्त्रणमा लिएको छ । पक्राउ परेकाहरूलाई प्रहरीको सिंहदरबार वृत्तमा राखिएको छ ।

विद्यालयका पियन, लेखापाल लगायतका कर्मचारीले निजामती कर्मचारीसरह सेवा सुविधा आफूहरुलाई पनि दिनुपर्ने माग राख्दै आएका छन् ।