झापा । झापामा न्वारानमा भोज खान गएका एउटै गाउँका २९ जना बिरामी परेका छन् ।

जिल्लाको मेचीनगर नगरपालिका-९ स्थित माथिल्लो मागुरमाडीका गोविन्द श्रेष्ठको नातिको न्वारानमा भोज खान गएका छरछिमेकका स्थानीयहरू फुड पोइजनका कारण बिरामी परेका हुन् ।

जिल्ला प्रहरी कार्यालय झापाका अनुसार फुड पोइजन भएकाहरूलाई वाकवकी लाग्ने, रिंगटा चल्ने, बान्ता हुने, ज्वरो आउने, पखाला चल्नेजस्ता स्वास्थ्य समस्या देखिएपछि धुलाबारीस्थित आम्दा मेची अस्पताल भर्ना भएका छन् ।

थप अनुसन्धानका लागि इलाका प्रहरी कार्यालय धुलाबारीबाट टोलीलाई खटिएको बताइएको छ । उपचाररत २९ जनामध्ये ९ जना सामान्य उपचारपछि घर फर्किसकेका छन् भने २० जनाको उपचार भइरहेको छ ।