काठमाडौं । एक भारतीय किशोरले सगरमाथा आधार शिविर (बेस क्याम्प) मा तबला बजाएर कीर्तिमान बनाएका छन् ।

भारतको मेरठ जिल्लाका १३ वर्षीय शिवम चौधरीले एभरेस्ट क्षेत्रको ट्रेकिङ गएको बेलामा उक्त कीर्तिमान बनाएका हुन् ।

गुरुग्रामको पाथवेज स्कुलका विद्यार्थी शिवम आफ्ना परिवारसँगै २८ मेमा ट्रेकिङ गर्न सगरमाथा क्षेत्र पुगेका थिए ।

सानैदेखि तबला बजाउन सिकेका शिवमले एभरेस्ट क्षेत्रको ट्रेकिङ जाँदा उनले आफ्नो तबला पनि बोकेरै गएका थिए ।

शिवमका बुबा रोहित चौधरी उक्त उचाइमा कुनै किशोरले तबला बजाएको सम्भवतः यो पहिलो घटना हुन सक्ने बताउँछन् ।