काठमाडौं । अख्तियार दुरूपयोग अनुसन्धान आयोगले मालपोत कार्यालय बाराका खरिदारविरुद्ध भ्रष्टाचार मुद्दा दायर गरेको छ।

अख्तियारले मालपोत कार्यालय बारामा कार्यरत खरिदार रामविश्वास साह र गौरीशंकर कुमार कुशवाहाविरुद्ध भ्रष्टाचार मुद्दा दायर गरेको हो ।

जग्गा रजिष्ट्रेसन पास गर्नका लागि सेवाग्राहीसँग १५ हजार घुस लिएको पुष्टि भएकाले साह र कुशवाहाविरुद्ध विशेष अदालत काठमाडौंमा भ्रष्टाचार मुद्दा दायर गरिएको आयोगका प्रवक्ता भोला दाहालले बताए ।

केही दिनअघि आयोगको टोलीले खरिदार साह र कुशवाहालाई १५ हजार घुससहित नियन्त्रणमा लिएको थियो। उनीहरूबिरुद्ध भ्रष्टाचार ऐन २०५९ को दफा ३ को उपदफा (१) वमोजिम जरिवाना र सजाय माग दावी गरिएको छ।