काठमाडौं । प्रधानमन्त्री पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधवकुमार नेपालबीच भेटवार्ता भएको छ ।

प्रधानमन्त्री प्रचण्डले सोमबार एकीकृत समाजवादीका अध्यक्ष नेपालसहितका सांसदहरूलाई प्रधानमन्त्री निवास बालुवाटारमा भेटेका हुन् ।

प्रधानमन्त्री प्रचण्डले नेकपा एकीकृत समाजवादीलाई सरकारमा बसेर बजेटको विरोध नगर्न आग्रह गरेका छन् ।

सरकारले पेश गरेको आगामी आर्थिक वर्षको बजेट एकीकृत समाजवादीका सांसद र नेताहरूले निरन्तर विरोध गर्न थालेपछि प्रचण्डले उनीहरूलाई बोलाएर छलफल गरेका हुन् ।

आर्थिक सङ्कट भएकाले धेरै योजना कार्यक्रम समेट्न नसकिएको प्रचण्डले समाजवादीका नेताहरूसँगको भेटमा प्रस्ट पारेका छन् ।

धेरै विकास निर्माण र योजनामा कार्यक्रम समेट्ने इच्छा रहेपनि सरकारले सबैलाई सम्बोधन गर्न नसकेको बताउँदै आएको छ ।

आगामी आर्थिक वर्षको बजेटमा एकीकृत समाजवादीका योजनाहरू नसमेटिएपछि विरोध जारी राखेका छन् ।