काठमाडौं । आईसीसी एकदिवसीय विश्व कप छनोटको तयारी अन्तर्गत दोस्रो अभ्यास खेलमा पनि नेपाल पराजित भएको छ । दक्षिण अफ्रिकामा भएको खेलमा नेपाल नेदरल्यान्ड्ससँग ५ विकेटले पराजित भएको हो ।

नेपालले दिएको १५७ रनको सामान्य लक्ष्य नेदरल्यान्ड्सले ३६ ओभर एक बलमा ५ विकेट गुमाएर भेट्टायो ।

यसअघि टस हारेर पहिले ब्याटिङको निम्तो पाएको नेपालका लागि कप्तान रोहित पौडेलले ३० र गुल्शन झाले २४ रन बनाउनुबाहेक अरुले राम्रो राम्रो ब्याटिङ गरेनन् ।

यसअघि बिहीवार भएको पहिलो अभ्यास खेलमा नेपाल स्कटल्यान्डसँग ७ विकेटले पराजित भएको थियो ।

अभ्यास खेलपछि नेपाली टोली दक्षिण अफ्रिकाबाटै जिम्बाब्वे जानेछ । जिम्बाब्वेमा हुने विश्व कप छनोट प्रतियोगितामा १० टोलीको सहभागिता रहेको छ ।