काठमाडौं । नेकपा एमालेका सांसद पृथ्वीसुब्बा गुरुङले आगामी आर्थिक वर्षको बजेट नारा र निबन्धको हिसाबले मात्रै राम्रो भएको बताएका छन् ।

बिहीबार प्रतिनिधि सभामा बजेटमाथिको छलफलमा भाग लिँदै सांसद गुरुङले यस्तो बताएका हुन् ।

सांसद गुरुङले भने, ‘नारा र निबन्धको हिसाबले त यो सबैभन्दा राम्रो बजेट हो तर यसले हिँड्न खोजेको बाटो गलत छ । हाम्रो समस्याग्रस्त शिक्षा र स्वास्थ्य क्षेत्र हो । त्यहाँ लगानी गर्ला भनेको तर त्यसो गर्न सकेको छैन । केन्द्रिकृत पञ्चायत र सिंहदरबारका सरकारले ल्याउन खोजेको बजेट जस्तो आएको छ । वित्तीय संघीयताको प्रबन्ध गरेर संघीयतालाई सबल गर्छौं लेख्नुभएको छ तर त्यो अनुसारको बजेट र नीति आएको छैन ।’

सांसद गुरुङले बजेटले हिंड्न खोजेको गन्तव्य अस्पष्ट रहेको बताए । गुरुङले शिक्षा, स्वास्थ्य क्षेत्रमा लगानी गर्ने योजना नरहेको, संघीयतालाई सबल बनाउने लक्ष्य नै नरहेको बताए । राजनीतिक अर्थशास्त्र नबुझेको बजेट आएको टिप्पणी गर्दै उनले पंचायत र बहुदलमा जस्तै बजेट आएको टिप्पणी गरे ।

संविधानले समाजवादको मार्गमा जाने भनेको तर बजेटमा भने त्यस्तो कुनै व्यवस्था नगरेको उनको भनाई छ । नेपालमा समाजमा आयमा असमानता, सम्पति वितरणमा असमानता, उत्पादित वस्तुको वितरण असमान रहेको उल्लेख गर्दै उनले यस्ता असमानताहरु हटाउने योजना बजेटमा पाउन नसकेको बताए ।