काठमाडौं । नेकपा एमालेका सांसद ठाकुर गैरेले अर्थमन्त्री डा. प्रकाशशरण महत र सरकारले देशका तीन जिल्लालाई मात्रै नेपाल देखेको र अन्य क्षेत्रलाई विभेद गरेको आरोप लगाएका छन् ।

सोमबार प्रतिनिधिसभामा आगामी आर्थिक वर्षको बजेटमाथिको छलफलमा बोल्दै सांसद गैरेले सरकारले देशका गोरखा, नुवाकोट र डडेल्धुरालाई मात्रै बजेट छुट्याएको भन्दै असन्तुष्टि व्यक्त गरेका हुन् ।

अर्थमन्त्रीले बजेट विनियोजन गर्दा तीन जिल्लालाइ कूल बजेटको ४० प्रतिशत रकम विनियोजन गरेर अन्य क्षेत्रलाई विभेद गरिएको टिप्पणी गरे।

सांसद गैरेले भने, ‘म सुन्दै छु, यो सरकारले एउटा डडेल्धुरा र डडेल्धुराका जनतालाई नेपाली देख्छ, अर्को नुवाकोट र नुवाकोटको जनतालाई मात्र नेपाली देख्छ, गोरखा र गोरखाको जनतालाई मात्र सम्पूर्ण नेपाली जनता देख्छ ।’

उनले आगामी आर्थिक वर्षको बजेटले कुनै दिशानिर्देशन नगरेको उल्लेख गर्दै विगतको इतिहासलाई नहेरि बजेट बनाएको बताए ।