काठमाडौं । सहीद स्मारक ए डिभिजन लिगमा साविक विजेता मछिन्द्र एफसीले अग्रता जोगाउन नसक्दा नेपाल पुलिस क्लबबसँग २-१ ले पराजित भएको छ ।

च्यासल मैदानमा आइतबार पुलिसले मछिन्द्रलाई २–१ गोल अन्तरले हराएको हो ।

पुलिसको जितमा मोसेस ग्याबाह त्वामले दुई गोल गरे । मछिन्द्रका आफिज ओलावालेले खेलको २७ औं मिनेटमा एक गोल गरे ।

जितसँगै पुलिस २४ खेलबाट ३७ अंक जोडेर लिग तालिकाको चौथो स्थानमा छ। मछिन्द्र २४ खेलमा ३९ अंक जोडेर दोस्रो स्थानमा रहेको छ ।

आइतबार नै त्रिपुरेश्वरस्थित दशरथ रंगशालामा भएको अर्को खेलमा एनआरटी र हिमालयनले १-१ गोलको बराबरी खेलेका छन् ।

यस बराबरीसँगै एनआरटीले २४ खेलमा ३० अंक जोड्दै दशौँ स्थानमा रहेको छ भने हिमालयनले २४ खेलमा ३१ अंक जोडेर सातौं स्थानमा रहेको छ ।