काठमाडौं । जनता समाजवादी पार्टी (जसपा)की सांसद मञ्जु शर्मा अन्सारीले सरकारलाई जतिसक्दो छिटो नागरिकता विधेयक ल्याउन आग्रह गरेकी छिन् ।

मंगलबार प्रतिनिधिसभाको बैठकमा शून्य समयमा बोल्दै सांसद अन्सारीले जन्मका आधारमा नागरिकता लिएकाका सन्तानलाई नागरिकता दिलाउनुपर्ने माग गरेकी हुन् ।

सांसद अन्सारीले भनिन्, ‘अस्ति प्रधानमन्त्रीको जवाफ बोली जुन सुनियो त्यसमा गोलमोटल जस्तो लाग्यो । नेपालमा जन्मिएर पनि नागरिक हुन नसकेको/नपाएको कस्तो बिडम्बना हो यो देशमा ?’

उनले प्रधानमन्त्री पुष्पकमल दाहाल प्रचण्डले नागरिकता विधेयकबारे गोलमोटल नीति लिएको आरोप लगाएकी छन् ।

नागरिकता बिना गोडा समेत सार्न अप्ठ्यारो हुने अवस्था रहेको भन्दै उनले सरकारको ध्यानाकर्षण गराईन् ।