काठमाडौं । धादिङको गल्छी गाउँपालिका–८ का विनोद थापामगरको होटेलमा खाएको पैसाको विषयमा विवाद हुँदा हत्या भएको खुलेको छ ।

बुधबार राति खाजा खान निबुवाबोटस्थित शानदार होटेल एण्ड लजमा छिरेका थापामगरको छुरा प्रहार गरी हत्या भएको थियो । सो होटेल एण्ड लजमा खाजा खाइसकेपछि पैसाको विषयमा भनाभन भएको थियो । होटेलमा खाएको पैसाको विषयमा होटेल सञ्चालिका सरस्वती पनेरु (पण्डित) सँग थापाको केहीबेर विवाद चलेको बताइएको छ ।

विवादपछि पण्डितले आफ्ना छोरा निरजलाई बोलाइन् । साथी किरण रानामगरलाई समेत लिएर होटेल पुगेका निरजले विनोदलाई सुरुमा पाँच–सात मुक्का प्रहार गरेको प्रहरीको अनुसन्धानबाट खुलेको छ । त्यसपछि आफूले साथमा ल्याएको फोल्डिङवाला छुरा प्रहार गरेर विनोदलाई घाइते बनाए ।

स्थानीयले घटनाको बारेमा थाहा पाएपछि विनोदलाई उपचारका लागि काठमाडौं लगियो । विनोदको उपचारका क्रममा काठमाडौंस्थित नर्भिक अस्पतालमा बिहीबार बिहान पौने दुई बजे मृत्यु भएको जिल्ला प्रहरी कार्यालय धादिङले जनाएको छ । खाजा खाएको पैसा दिन आनाकानी भएपछि विवाद उत्पन्न भएर हत्या गरिएको प्रारम्भिक अनुसन्धानमा खुलेको धादिङ प्रहरीको भनाई छ ।

घटनामा प्रयोग भएको छुरा घटनास्थलदेखि ३० मिटर उत्तरतर्फ त्रिशुली नदितर्फको किनारमा आज बिहान फेला पारिएको थिायो । धादिङ प्रहरीका अनुसार घटनामा संलग्न ४७ वर्षीया सरस्वती पनेरु (पण्डित), उनका छोरा २६ वर्षीय निरज पण्डित र पाल्पाको तानसेन नगरपालिका–१४ घर भई हाल गल्छी–८ मा बस्दै आएका किरन रानालाई पक्राउ गरिएको छ । तिनैजनालाई कर्तव्य ज्यान मुद्दामा सम्मानित धादिङ जिल्ला अदालतबाट तीनदिन म्याद थप अनुमती लिई प्रहरीले अनुसन्धान थालेको छ ।