काठमाडौं । प्रधानमन्त्री पुष्पकमल दाहाल ‘प्रचण्ड’ले सरकारले सामाजिक न्याय, सुशासन र समृद्धिलाई प्रमुख लक्ष्य बनाएको बताएका छन् ।

बुधबार कम्युनिस्ट नेता निर्मला लामाको २३ औं स्मृति दिवसका अवसरमा आयोजित कार्यक्रमलाई सम्बोधन गर्दै प्रधानमन्त्री ‘प्रचण्ड’ ले यस्तो धारणा राखेका हुन् ।

उनले वर्तमान सरकारले नराम्रा काम गर्दै नगर्ने र सम्मृद्धिको यात्रालाई नयाँ ढंगले सुरु गर्ने सरकारले अठोट लिएको बताए।

उनले भने, ‘सुशासनका लागि हामी गम्भीर भएर अठोटका साथ अगाडि बढेका छौं । सामाजिक न्याय र समृद्धिका लागि पनि अगाडि बढेका छौं ।’

प्रधानमन्त्री प्रचण्डले सुशासन र सामाजिक न्यायका निम्ति आम इमान्दार जनता, क्रान्तिकारी, बुद्धिजीवी र नागरिक समाजको सहयोग रहने विश्वास समेत व्यक्त गरे ।

राजनीतिमा जटिलता आइरहने भन्दै सुशासन कायम गर्ने क्रममा सरकारले कुनै कसर बाँकी नराख्ने उनको भनाई थियो ।