काठमाडौं । नेपाली कांग्रेसका सभापति शेरबहादुर देउवा र भारतीय जनता पार्टी (भाजपा)का विदेश विभाग प्रमुख विजय चौथाइवालेबीच भेट भएको छ ।

नेपाल भ्रमणमा रहेका भाजपाका विदेश विभाग प्रमुख चौथाइवालेले कांग्रेस सभापति देउवासंग आज भेटवार्त गरेका हुन् ।

चौथाईवालेले नेकपा एकीकृत समाजवादीका अध्यक्ष माधवकुमार नेपाल र उपप्रधान तथा गृहमन्त्री नारायणकाजी श्रेष्ठलाई मंगलबार छुट्टाछुट्टै भेटेका छन् ।

भेटमा नेताहरुले दुई पक्षीय सम्बन्धलाई बलियो बनाउनेबारे जोड दिनुका साथै दलगत सहकार्यलाई पनि बढावा दिने विषयमा कुराकानी भएको चौथाइवालेले आफ्नो ट्वीटरमा उल्लेख गरेका छन् ।

चौथाइवाले बिहीबार नयाँ दिल्ली फर्कने छन् । उनी वैशाख ३ गते धनगढीमा भएको मानसखण्ड सम्मेलन समापन समारोहमा सहभागी हुन सडकमार्गबाट नेपाल आएका थिए ।

भेटमा दुई देशबीच सामाजिक, आर्थिक, सांस्कृतिक राजनीतिक, कूटनीतिक सम्बन्धलाई अझ बलियो बनाउने विषयमा छलफल भएको चौथाइवाले बताए । उनले साँझ प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी शर्मा अ‍ोलीसँग पनि भेटघाट गर्ने कार्यक्रम रहेको छ ।