काठमाडौं । आन्दोलनरत मिटरब्याज पीडितहरुले राज्यबाटै आफूहरूको आन्दोलन भड्काउने, उत्तेजित पार्ने काम गरेको आरोप लगाएका छन् ।

मिटर ब्याज तथा ठगीविरुद्ध किसान–मजदुर सङ्घर्ष समितिका अध्यक्ष अवधेश कुशवाहाले मंगलबार विज्ञप्ति जारी गर्दै आफूहरूको आन्दोलनभित्र छिरेर प्रहरीले भड्काउने काम गरेको बताएका हुन् ।

सरकार नै आफूहरूको आन्दोलन दबाउन उद्यत रहेको भन्दै मिटरब्याज पीडितहरुले गृहमन्त्री नारायणकाजी श्रेष्ठको राजीनामा माग गरे ।

आफूहरुको माग सम्बोधन गर्नुको साटो प्रहरी प्रशासन लगाएर दमन गरेको भन्दै गृहमन्त्री श्रेष्ठको राजीनामाको माग समेत गरेका छन् ।

आन्दोलनभित्र छिरेर प्रहरीले ज्येष्ठ नागरिक, अशक्त तथा बिरामीमाथि कुटपिट गरेको, महिलामाथि पुरुष प्रहरीले आक्रमण तथा दुर्व्यवहार गरेको मिटरब्याज पीडितहरुको आरोप छ ।

किसान मजदुर विरोधी गृहमन्त्री राजीनामा दे, प्रहरीको दमन बन्द गर, महिलामाथिको दुर्व्यवहार बन्द गर, आफ्ना माग पुरा गर लगायतका नारा लगाएका थिए ।

सोमबार शान्ति वाटिकाबाट सिंहदरबारसम्म आफूहरूको शान्तिपूर्ण जुलुस जाने कार्यक्रम रहेकोमा बिहानैदेखि प्रहरीले शान्तिवाटिका क्षेत्र पूर्ण रुपमा नियन्त्रणमा लिँदै पीडितहरुलाई आवतजावतमै निषेध र धरपकड गरिएको पीडितहरुको आरोप छ ।