काठमाडौं । सहिद स्मारक ‘ए’ डिभिजन लिग फुटबलमा मछिन्द्र फुटबल क्लबले फराकिलो जित निकालेको छ ।

च्यासल मैदानमा मंगलबार भएको खेलमा मछिन्द्रले एफसी खुमलटारलाई ७-३ गोल अन्तरले फराकिलो जित निकालेको हो ।

मछिन्द्रको जितमा आफिज ओलावालेले ह्याट्रिकसहित ५ गोल गरे । विमल घर्ति मगर र विजय भुजेलले एक एक गोल थपे।

खुमलटारका मेसुके ओलुमोउले दुई तथा स्टेफेन बिनोङले एक गोल फर्काए ।

जारी लिगमा मछिन्द्रको यो तेस्रो जित हो । मछिन्द्र ८ खेलमा १२ अंक जोड्दै तालिकाको छैटौँ स्थानमा उक्लिएको छ । ८ खेलबाट ७ अंक जोडेको खुमलटार भने लिग तालिकाको १० औँ स्थानमा छ ।