काठमाडौं । राजस्व अनुसन्धान विभागले २० वटा मालवाहक ट्रक नियन्त्रणमा लिएर छानबिन सुरु गरेको छ । राजस्व छलीको शंकामा दक्षिणी भन्सार नाकाबाट छुटेका दुईवटा भारतीयसहित २० वटा ट्रकमाथि विभागले अनुसन्धान थालेको हो ।

ती ट्रकहरुलाई वीरगन्ज, विराटनगर, भैरहवा, रसुवा भन्सारबाट काठमाडौं आउने क्रममा बाटैबाट नियन्त्रणमा लिइएको विभागले जनाएको छ । सामान बोकेका केही ट्रक चोभार सुख्खा बन्दरगाहबाट नियन्त्रणमा लिइएको बताइएको छ । अहिले नियन्त्रणमा लिइएका कन्टेनरहरू पुल्चोकस्थित विभागको हातामा राखिएको छ ।

विभागले १० दिनदेखि नियन्त्रणमा लिइएका ट्रक जाँच गरेर अनुसन्धान थालेको छ । मुलुकमा राजस्व संकलन न्यून भएर साधारण खर्च धान्नसमेत कठिन भएका बेला भन्सार नाकाहरुबाट हुने आयातमा बढी निगरानी गरिएको छ ।

करोडौं मूल्यका सामान आयातका क्रममा नियन्त्रणमा रहेका ट्रक छानबिन गरेर छाड्ने वा मुद्दा चलाउने निर्णय हुने विभागको भनाई छ । विभागले विशेष सूचनाका आधारमा राजस्व आयात गरिएका सामानहरुमा तयारी कपडा, जुत्ता, हार्डवेयर, कस्मेटिक, टायल, ब्लाङ्केट, चामललगायतका छन् ।