काठमाडौं । विशेष अदालतले यातायात कार्यालय इटहरी कोशीका ११ कर्मचारीलाई राजस्व हिनामिनामा भ्रष्टचारी ठहर गरेको छ । एकै प्रकरणका फरक फरक दुई मुद्दामा अदालतले चार उपसचिवसहित ११ जनालाई भ्रष्टाचारी ठहर गरेको हो ।

मंगलबार विशेषका अध्यक्ष श्रीकान्त पौडेल तथा सदस्यद्वय शालिग्राम कोइराला र बलभद्र बाँस्तोलाको इजलासले उनीहरूको सजाय निर्धारणका लागि पेसी तोकेको छ । न्यायाधीश श्रीकान्त पौडेल, शालिग्राम कोइराला र बलभद्र बास्तोलाको इजलासले अब चैत ८ गते सजाय निर्धारण गर्नेछ ।

प्रवक्ता दिपेन्द्रनाथ योगीका अनुसार अदालतले कार्यालयका तत्कालीन उपसचिव रमेशप्रसाद दाहाल, विष्णुप्रसाद पौडेल, नयराज नेपाल र होमनाथ भट्टराईको कसुर ठहर गरेको हो । यसैगरी लेखा अधिकृत कुमारबहादुर कटुवाल, टिकराम अधिकारी पनि भ्रष्टाचारी ठहर भएका छन्।

अदालतले लेखापाल सुरेश अधिकारी, देवराज नेपाल, रुद्रप्रसाद दाहाल, मणिराज दाहाल र सह(लेखापाल टंकबहादुर खड्कालाई पनि कसुरदार ठहर गरेको छ।

अख्तियारले यातायात व्यवस्था कार्यालय इटहरीको आर्थिक वर्ष ०७१/७२ देखि ०७३/७४ को फागुन मसान्तसम्मको राजस्व रकमबारे अनुसन्धान गरेकोमा ६१ करोड २१ लाख २८ हजार रुपैयाँभन्दा बढी रकम हिनामिना भएको भेटिएको थियो ।

यस्तै आर्थिक वर्ष ०६९/७० देखि ०७०/७१ सम्म बैंक दाखिला गर्नुपर्ने ८ करोड ९६ लाख रुपैयाँभन्दा बढी रकम खाएको र मासेर हिनामिना गरेको अभियोगपत्रमा दाबी थियो ।