धनगढी । नेकपा एमालेका केन्द्रीय सचिव तथा सुदूरपश्चिम इन्चार्ज लेखराज भट्टले मुलुकलाई समृद्ध र जनतालाई सुखी बनाउन माजवादमा जाने एमालेको लक्ष्य भएको बताएका छन् ।

एमालेको धनगढी नगर स्तरीय जनसंगठनहरुको अभिमुखीकरण कार्यक्रमलाई सम्बोधन गर्दै पूर्व उद्योग वाणिज्य तथा आपूर्ति मन्त्री समेत रहेका भट्टले यस्तो बताएका हुन् ।

उनले जनपक्षीय नीति र कामले मात्र समाजवाद स्थापना गर्न सकिने उल्लेख गरे ।

इन्चार्ज भट्टले भने, ‘संसद, सरकार हुँदै जनपक्षीय नीति बनाएर देशलाई समृद्धि बनाउदै नेपालीलाई सुखी र समृद्ध बनाउन समाजवादमा जाने हो। त्यसैका लागि पार्टीले दुई महिने ग्रासरुट अभियान चलाएको हो ।’

भट्टले हालै सम्पन्न भएका तीन तहका चुनावमा आन्तरिक समस्याले गर्दा पराजय व्यहोर्नुपरेको बताउदै पार्टीको नीति, सिद्धान्त र निर्णय पालन गर्न निर्देशन समेत दिए।

नेतृत्वसँग कार्यकर्ता मात्र नभएर जनतालाई पनि जोड्ने उद्देश्यले पार्टीले मिसन ग्रासरुट अभियान सञ्चालन गरेको उनको भनाई थियो ।