काठमाडौं । नवनिर्वाचित राष्ट्रपति रामचन्द्र पौडेलले आफूलाई मतदान गरी विजयी बन्ने अवसर दिएकोमा सबै मतदातालाई आभार व्यक्त गरेका छन् ।

राष्ट्रपतिमा निर्वाचन भएपछि एक वक्तव्य जारी गर्दै पौडेलले शहीदप्रति श्रद्धासुमन अर्पण गर्दै मतदातालाई आभार व्यक्त गरेका हुन् ।

साथै उनले ‘राष्ट्रपति–संस्था’ले निर्वाह गर्ने भूमिकाले संविधान र शासन व्यवस्थाको अभ्यास प्रभावित हुनेमा सचेत रही निर्दिष्ट कार्यसम्पादन गर्दा निष्पक्षता, तटस्थता तथा विधिको पालनामा प्रतिबद्ध रहने प्रण गरे ।

राष्ट्रपतिमा निर्वाचित भएपछि सबैमा आभार प्रकट गर्दै राष्ट्रपतिका काम, कर्तव्य तथा जिम्मेवारी वहन गर्दा संविधानप्रदत्त मर्यादा तथा संविधानका अक्षर र भावनालाई आत्मसात गरी दिगो शान्ति, सुशासन, विकास र समृद्धिको आकाङ्क्षा पूरा गर्ने राष्ट्रिय अभियानमा सरिक हुन सदैव तत्पर रहने प्रतिज्ञा गरेका छन्।

‘नेपालको राष्ट्रिय एकताको प्रवर्द्धन, स्वाधीनताको रक्षा, संविधानको पालना र संरक्षण गर्ने संवैधानिक जिम्मेवारी नै मेरा मार्गनिर्देशक सिद्धान्त रहनेछन्’, पौडेलले जारी गरेको वक्तव्यमा भनिएको छ।