काठमाडौं । झन्डै १७ लाख डलर मूल्य पर्ने मदिरा चोरेको अभियोगमा जोडीलाई स्पेनमा चार वर्ष कारागारको सजाय सुनाइएको छ । मेक्सिकोकी एक पूर्वसुन्दरी र उनका प्रेमीलाई त्यहाँको अदालतले कारागारको सजाय सुनाएको हो ।

बीबीसीका अनुसार सन् २०२१ मा स्पेनको कासेरेस सहरस्थित एउटा विलासी होटलबाट ४५ बोलत मदिरा चोरी भएको थियो । त्यतिबेला अभियुक्तहरू उक्त होटलमा बसेका थिए। चोरी गरेर उनीहरू त्यहाँबाट भागेका थिए।

तर नौ महिनापछि क्रोएशिया-मोन्टिनिग्रोको सीमामा पक्राउ गरेर उनीहरूलाई स्पेन फर्काइएको थियो। चोरी भएको मदिराको कुनै बोतल पनि फेला परेको छैन। अदालतले उक्त जोडीलाई टाटानिया र इस्टानिस्लाओ भनेर मात्र चिनाएको छ।

अदालतले उनीहरूलाई साढे सात लाख यूरोभन्दा बढी जरिवाना तिर्न पनि आदेश दिएको छ। यद्यपि उनीहरूले अदालतको आदेशलाई चुनौती दिन पुनरावेदन गर्न पाउनेछन्।