काठमाडौं । नयाँ राष्ट्रपति चयनको विषयलाई लिएर माओवादी केन्द्र, प्रतिनिधिसभाको सबैभन्दा ठूलो दल कांग्रेस, जनता समाजवादी, एकीकृत समाजवादीलगायतका राजनीतिक दलहरूबीच छलफल हुने भएको छ ।

राष्ट्रपति निर्वाचनलाई लिएर पुरानो पाँच दलीय गठबन्धन ब्युँताउने तयारीका साथ उनीहरुबीच भेटघाट हुने भएको हो ।

प्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ राष्ट्रपतिमा सर्वसम्मति वा अधिकतम सहमतिका लागि राजनीतिक दलका नेताहरूसँग छलफलमा जुटेका छन् ।

प्रधानमन्त्री प्रचण्डले अहिले एकीकृत समाजवादीका अध्यक्ष माधवकुमार नेपालसंग सिंहदबारमा छलफल गरिरहेका छन् । प्रधानमन्त्री प्रचण्डले राष्ट्रपति निर्वाचनबारे राष्ट्रिय स्वतन्त्र पार्टीका नेताहरूसँग पनि छलफल गर्ने तयारी गरेको बालुवाटार स्रोतको दाबी छ ।

प्रधानमन्त्री दाहाल र कांग्रेस सभापति शेरबहादुर देउवाले सुरुमा दुई पक्षीय र बहुपक्षीय छलफल गर्ने र साँझ सबै राजनीतिक दलहरू एकठाउँमा बस्ने तयारी भइरहेको जनाईएको छ ।

प्रधानमन्त्री निवासमा बुधबार कांग्रेस सभापति देउवा लगायत नेताहरूले प्रधानमन्त्री दाहालसँग राष्ट्रपति निर्वाचनबारे छलफल गरेका थिए ।

बुधबार पनि कांग्रेस, माओवादी, एकीकृत समाजवादी, लोकतान्त्रिक समाजवादी पार्टी लगायतका नेताहरूले दुईपक्षीय छलफल गरेका थिए । त्यसपछि बालुवाटारमा भएको छलफलमा कांग्रेसबाट राष्ट्रपति उम्मेदवार बनाउने समझदारी भएको थियो ।