काठमाडौं । जिल्ला अदालत काठमाडौंले स्पट फिक्सिङको आरोपमा पक्राउ परेका क्रिकेटर मोहमद आदिल आलमसहित तीन जनालाई धरौटीमा रिहा गर्न आदेश दिएको छ ।

अदालतका न्यायाधीश राजेन्द्रकुमार श्रेष्ठको इजलासले उनीहरुसँग ३ लाख रुपैयाँका दरले धरौटी माग गर्ने आदेश दिएको हो । सीआईबीका अनुसार अदालतले माग गरेको धरौटी बुझाएर उनीहरु थुनामुक्त हुन पाउने छन् ।

बाराको सिम्रौनगढ-३ का मोहमद आदिल आलम, सप्तरीको राजविराजका महबुब आलम र पर्साको वीरगन्जका नितेश गुप्ता पक्राउ परेका थिए ।

सोही मुद्दामा काठमाडौंको कलंकीका नविन कँडेल र सप्तरीको राजविराजका रबि माझी भने फरार छन् । उनीहरुलाई गत पुस ९ गतेदेखि २७ गतेसम्म भएको नेपाल टि-२० लिगमा स्पट फिक्सिङमा संलग्न रहेको आरोपमा पक्राउ गरिएको थियो ।