काठमाडौं । काठमाडौंको बालाजुमा भएको यातायात मजदुरको आन्दोलनको घटनामा दुई जना डिएसपीलाई कारबाही गर्न सिफारिस गरिएको छ ।

बालाजुको आन्दोलनमा ठूलो क्षति भएपछि काठमाडौं उपत्यका प्रहरी कार्यालय रानीपोखरीले डिआइजी मसाउद आलम खाँको नेतृत्वमा पाँच सदस्यीय छानबिन समिति गठन गरेको थियो ।

सोही छानबिन समितिले बालाजु प्रहरी वृत्तका तत्कालीन डिएसपी रविन विष्ट र सोह्रखुट्टे वृत्तका डिएसपी गणेशबहादुर बमलाई कारबाही सिफारिस गरेको हो ।

यातायात मजदूरको आन्दोलनका क्रममा प्रहरी वृत्त बालाजुका डिएसपी चढ्ने बा २ झ १४४ नम्बरको गाडी र बा १ झ ७२२४ नम्बरको अर्को गाडी तोडफोड गरी जलाइएका थिए।

ल्होत्से मलका दुई मोबाइल पसलमा पनि लुटपाट भएको हो । जिल्ला प्रहरी परिसर काठमाडौंले आगजनी तोडफोडमा ३५ जना र लुटपाटमा १६ जना गरी ५१ जनालाई पक्राउ गरेको छ । उनीहरूमाथि आपराधिक उपद्रव र चोरी तथा डाँका मुद्दामा अनुसन्धान अघि बढाएको छ ।