काठमाडौं । राष्ट्रपति निर्वाचनका लागि काठमाडौंको अन्तर्राष्ट्रिय सम्मेलन केन्द्र नयाँ बानेश्वरमा निर्वाचन अधिकृतको कार्यालय खुलेको छ ।

कार्यालय उद्घाटन गर्दै निर्वाचन आयोगका प्रमुख निर्वाचन आयुक्त दिनेशकुमार थपलियाले फागुन २५ गते बिहान १० देखि दिउँसो ३ बजेसम्म मतदान हुने बताए ।

निर्वाचनको मतपरिणाम साँझ ७ बजेभित्र आइसक्ने जनाइएको छ । निर्वाचनका लागि उम्मेदवारी दर्ता फागुन १३ गते गर्नुपर्ने कार्यतालिका छ ।

राष्ट्रपतिको चुनावमा सङ्घीय संसद्को दुवै सदन राष्ट्रिय सभा र प्रतिनिधि सभा सदस्य तथा सात वटै प्रदेशका प्रदेश सभा सदस्य मतदाता हुने कानुनी व्यवस्था छ।

सङ्घीय संसद्का सदस्यको मतभार ७९ र प्रदेश सभा सदस्यको मतभार ४८ हुनेछ । यता दलहरूले राष्ट्रपति उम्मेदवार कसलाई बनाउने टुंगो लगाइसकेका छैनन् ।